第一堂!

第一堂的 Widget 非常成功, 第一次去參與一個 3 小時的教學, 小小辛苦, 不過非常開心, 似乎大家都明白寫 Widget 真係唔係一件難事. 真係希望多 d 人會寫 Widget.

Mactivity & WithoutWidget 合辦: Widget 製作基礎課程（三小時)

蘋果活動...

似乎今年真係蘋果年, 剛剛上個月出左 Intel iMac, MacBook Pro, 上個月尾又出左 iPod Nano 1GB (發發既生日禮物), 下星期又有新野... 期待!



我真係好想買架 Apple Portable...

忙的開始 Part II...

我相信呢個月係我近呢幾年黎叫做比較忙的一個月, 油站的工作, 寫 Thesis, 寫 Widget, 過新年中, 過情人節... 等等. 可能呢幾年係英國抖既日子就係為左今日做準備. 有時, 忙, 先會代表自己係有用的...

其實呢個月發生好多野, JS 考車既前哨戰, Apple 免費 Upgrade CPU, 為 MatMat 準備的情人節, 換新身分證加 e-Cert 怪事, 裝冷氣比人 Complain 等等等, 好想打上 Weblog, 不過一坐到去電腦面前就會上下去開的 Website, 睇下睇下又無左打 Weblog 果一回事... om..

忙忙忙....

今個星期開始朝 9 晚 X (唔知幾時) 地返油站幫手.. 真係有 d 唔慣, MatMat 呢個星期又好似好忙. 新年完又真係多野攪...

再見了! 仔仔...

仔仔係年初二比旺財咬之後, 一直都無好轉, 就算幾日前睇醫生, 食藥, 情況都係一樣, 今日帶仔仔去複診, 醫生話情況有惡化. 要決定做手術, 不過因為仔仔有發低溫燒, 所以好危險, 就 Suggest 不如比仔仔舒服咁"去". 睇過仔仔呢幾日病同個傷口既情況, 我已經 Expect 唔會有好大轉機, 我自己都唔想仔仔辛苦落去, 食都食唔到野. 所以我同爸爸決定令仔仔舒服 d, 比仔仔去天主既身邊.

其實屋企既咁多隻狗, 我同仔仔既關係算最好, 係我帶佢返黎, 亦係我送佢走. 雖然收養左只有一個月多 d, 不過仔仔走之前己經習慣要係我大脾同我一齊上網. 我以後上網就唔會再有仔仔陪. 上年 BoBo 去左, 今年 仔仔亦離開左我地, 相信我地屋企會暫時唔會再養細狗, 始終大狗同細狗都有多 d 機會有衝突. 細狗往往成為受害者....

仔仔:

我們相識只有一個月, 不過永遠懷念你...

2005-2006

新年病了演唱會...

今個新年, 悲喜參半. 喜既係好耐冇係香港過新年, 同屋企人朋友歡敘一起, 當然開心. 唔開心係黎左一個月多 d 既仔仔 (松鼠狗) 係年初 2 比旺財咬左一下, 初時以為只係皮外傷, 好快會無事, 點不知尋日年初 3 係好呆下唔想食野, 以為都會 OK. 點知今日, 年初 4, 都重係好呆, 我就同佢睇下, 發覺個傷口開始有惡臭, 原來幾深同好傷, 真係大件事, 就立即同仔仔去睇醫生, 醫生話個傷口感染幾嚴重, 發炎, 附近皮膚都受到感染變黑, 可能要做手術, 同有生命危險. 仔仔宜家暫時要定時食藥, 每日洗傷口, 希望會快 d 退燒, 先叫做好轉.

另外, 今日陪我去睇獸醫既係 MatMat, MatMat 本來係入黎拜年, 玩下狗, 點知當我發現仔仔個傷口好嚴重, 我就同 MatMat 帶仔仔去睇獸醫, 相信 MatMat 都感受到養狗仔會幾擔心. MatMat 今日黎除左拜年之外, 亦係同我一齊去睇李克勤演唱會, 成個演唱會氣氛好好, 其中有一個環節係克勤講返佢係 05 年過左身既 Lucky, 相當感人, 我相信 MatMat 同我都有流眼淚, 相信我地因為今日獸醫既事, 明白動物有時比人同人既關係更真更 Close, 明白自己或者動物唔能夠去溝通, 表達唔到痛苦, 離別既傷痛. 幾個月前 Bo 仔離開左我地, 都今日仔仔重病中. 自己盡了一切既方法去令佢地無咁痛苦, 但係, 可以做的已經做左, 無能也無力, 希望仔仔快 d 好返...

但願天下人同人, 寵物同寵物既主人, 珍惜眼前事物....